– Sommaren på Københavns lufthamn har vore ganske forferdeleg, seier kommunikasjonssjef Sara Westphal Emborg Neergaard for Norwegian i Danmark til den danske finansavisa Finans.
Neergaard vil ikkje utelukke at Norwegian som konsekvens vil prioritere opp nærværet sitt på Billund lufthamn på Jylland på kostnad av Kastrup i 2027.
I oktober 2025 lanserte Norwegian ti nye direkteruter frå Billund, mellom anna til Milano, Napoli, Nice og Edinburgh.
Kjem av nytt system for grensekontroll
Dei lange køane ved passkontrollen har oppstått i kjølvatnet av EUs nye digitale EES-system, som er eit grensekontrollsystem. Ifølgje Finans har grensekontrollen med det nye systemet vorte meir grundig og dermed også meir tidkrevjande.
Kommunikasjonssjefen seier køane har vore eit problem i både mai, juni og juli. Det har ført til at passasjerar har gått glipp av flya sine, og at fleire fly har hatt forseinkingar, seier ho til Finans.
Samuel Rude, trafikksjef på Københavns lufthamn, seier han anerkjenner kritikken frå Norwegian og tek han på alvor.
– Men dei skrekkscenarioa som ein frykta i forkant av sommarferien, har vi ikkje opplevd. Det betyr ikkje at passasjerar og flyselskap aldri har opplevd lange køar ved tryggleiks- og passkontrollen, seier han til Finans.
Ikkje dei første til å irritere seg over køproblem
Tidlegare har danske Børsen omtalt korleis flyselskapet SAS også har kritisert lange køar i passkontrollen på Kastrup.
Det fekk SAS til å setje i gang planlegginga av å flytte trafikk frå København til Arlanda lufthamn i Stockholm i løpet av våren. Førebels har planane ikkje vorte sette ut i livet.
(©NPK)
0 kommentarer