(NPK-NTB): – Det er nedbør som er stikkordet for heile landet, seier meteorologen om prognosane for dei neste dagane.

Allereie onsdag starta regnvêret på Austlandet og Sørlandet, og nedbøren aukar utover dagen medan han flyttar seg nordover.

– Det blir nok kraftigast regn i Sogn og Fjordane-området, men også ein god dose på Austlandet, seier vakthavande meteorolog Johanne Ordahl ved Meteorologisk institutt til NTB.

Gjennom juli har det vore sendt ut farevarsel for skogbrann i delar av Austlandet og Agder. Regnet gjer at det gule varselet blir fasa ut onsdag.

Ikkje heilt haust enno

Sjølv om det blir vått, held temperaturane seg relativt høge. Dei næraste dagane kan Austlandet og Sørlandet få opp mot 20 grader enkelte dagar.

I Vest- og Midt-Noreg vil det stort sett liggje på rundt 15 grader, med enkelte toppar mot 19 grader.

Torsdag spreier nedbøren seg til Nordland og Lofoten.

– Nordland er nok best i dag, medan Troms og Finnmark kan få ein fin dag i morgon, seier Ordahl.

På Svalbard er prognosane annleis: etter ein periode med godt vêr og tosifra grader, er det venta snø i helga.

Pustepause i helga

Utover fredag kveld og laurdag blir det regnbyer på Vestlandet, før nedbøren treffer Sør-Noreg søndag ettermiddag. Lengst i nord blir det tørrast.

– Til helga kan det bli mindre nedbør totalt sett. Det er ikkje noko lågtrykk som gir langvarig regn, ifølgje meteorologen.

Neste veke er det likevel på’n igjen med regn frå sør til nord.

– Det er ikkje berre vestlendingane og nordlendingane som får regn denne gongen. Alle skal få, smiler meteorologen.

(©NPK)