(NPK-NTB-AP): Amerikanske angrep retta mot dei iranskstøtta houthiane i Jemen kosta minst 153 sivile menneskeliv i fjor, ifølgje det amerikanske forsvarsdepartementet Pentagon.

Talet kjem fram i ein ugradert gjennomgang av angrepa. Nyheitsbyrået AP har fått tak i dokumentet, som vart sendt til Kongressen som ein del av ein årleg rapport om sivile tap. Ein ikkje namngitt tenestemann i Pentagon seier rapporten skal leggjast fram dei næraste månadene.

Gjennomgangen har konsentrert seg om tre flyangrep i april 2025, som var ein del av USAs offensiv mot houthiane. Opprørsgruppa angreip handelsskip i Raudehavet, ein viktig handelsveg som knyter Asia til Suezkanalen og Middelhavet, inkludert Israel.

Angrepa var retta mot styrkar i eller nær den jemenittiske hovudstaden Sana, som blir kontrollert av houthi-opprørarane, og mot hamnebyen Ras Isa. Til saman 153 sivile vart drepne og 243 såra.

Pentagons gjennomgang kjem samtidig som bekymringa aukar rundt sivile tap i militæraksjonar i Donald Trumps presidentperiode.

(©NPK)