(Reuters-AP-NTB-NPK): Saudiarabisk luftvern hindra måndag eit droneangrep retta mot oljeanlegg i landet. Dronane skal ha komme frå Irak og Jemen.

Droneangrepet frå Irak var retta mot oljeanlegg aust i Saudi-Arabia og i hovudstaden Riyadh, ifølgje forsvarsdepartementet i Saudi-Arabia.

– Terrorforsøka vart sette i verk frå irakisk territorium og utførte av iranskstøtta terrormilitsar, heiter det i ei fråsegn.

Det saudiarabiske utanriksdepartementet fordømmer angrepet og held fast på at landet har rett til å svare på aggresjon og å avskrekke dei ansvarlege for angrepet.

Dei oppmoda også den irakiske regjeringa til å setje i verk alle nødvendige tiltak for å hindre at irakisk territorium blir brukt som utgangspunkt for angrep mot Saudi-Arabia.

Houthi-angrep

Houthi-rørsla i Jemen angreip også mål i Saudi-Arabia måndag.

Gruppa seier angrepet var retta mot anlegg for forsyning og transport av råolje som knyter det austlege Saudi-Arabia til hamnebyen Yanbu ved Raudehavet.

Den militære talsmannen i gruppa Yahya Saree sa at aksjonen var eit svar på saudiarabiske droneangrep mot Jemen.

Houthiane er allierte med Iran og har høve til å true skipsfarten gjennom Bab al-Mandab-stredet ved innløpet til Raudehavet.

Saudi-Arabia har auka oljeeksporten gjennom Raudehavet og Suezkanalen etter at Iran stengde Hormuzsundet som svar på angrepskrigen til USA og Israel.

Kontor i Bagdad

Ifølgje den proisraelske amerikanske tankesmia Washington Institute opna houthiane eit kontor i Bagdad alt i 2011.

Leiaren i houthiane Abdel Malek Al-Houthi opplyste i 2024 at gruppa koordinerte militæroperasjonar med Iran-støtta militsar i landet.

I juni same år vart det hevda at dei i samarbeid hadde gjennomført fleire felles angrep mot mål i Israel og israelske fartøy i Raudehavet, men det vart ikkje stadfesta frå uavhengige kjelder at angrepa var eit resultat av eit slikt samarbeid.

Det er ikkje kjent at houthiane har etablert eige militært nærvær i land utanfor Jemen.

(©NPK)