(NTB-NPK): Noreg får meir igjen for deltakinga i EU sitt utdanningsprogram Erasmus+ enn det kostar, ifølgje ei ny evaluering bestilt av Kunnskapsdepartementet.

Evalueringa viser at interessa for programmet er stor og aukande. Mellom 2021 og 2027 vil rundt 135.700 elevar, ungdommar, lærlingar, studentar, lærarar og andre frå Noreg ha delteke i Erasmus+-aktivitetar.

– Evalueringa viser at det har stor verdi at norske elevar, lærlingar og studentar kan lære, samarbeide og hente erfaringar utanfor Noregs grenser. Derfor er eg glad for å sjå at programmet er meir populært enn nokon gong, seier forskings- og høgare utdanningsminister Sigrun Aasland (Ap) i ei pressemelding.

Noreg har delteke i Erasmus+ sidan 1992. Programmet gir mellom anna studentar høve til å reise på utveksling, lærlingar til å få praksis i utlandet og skular og utdanningsinstitusjonar til å samarbeide med aktørar i andre europeiske land.

Den samfunnsøkonomiske analysen viser at Erasmus+ kostar meir enn om Noreg hadde finansiert tilsvarande aktivitetar gjennom ei nasjonal ordning. Likevel konkluderer evalueringa med at den samla nytta er større enn kostnadene.

Blant gevinstane som blir trekte fram, er kompetanseutvikling, internasjonale nettverk, inkludering og tilgang til europeiske samarbeidsarenaer.

(©NPK)