– Dette er openbert eit problem. Det er ein konsentrasjonstjuv som kan svekkje læringa. Det øydelegg for andre studentar og for forelesaren om ein har mange distraksjonar i ein forelesingssal, seier Aasland til Khrono.
Ifølgje Aasland er det ikkje noko i lovverket som hindrar universitet og høgskular frå å innføre eit mobil- eller skjermforbod i dag.
– Ta diskusjonen
Førstelektor Lars Dehli ved Høyskolen Kristiania innførte i april eit skjermforbod i forelesingane sine. Han var lei av ukonsentrerte studentar som gjorde alt anna enn å lytte og ta notat.
Onsdag møttest Aasland og Dehli for å diskutere skjermforbodet.
– Det første vi må seie til institusjonane, er: Ta denne diskusjonen. Sjå på kva de treng å gjere, seier Aasland.
Studentane deler ikkje nødvendigvis oppfatninga. Khrono og Norsk studentorganisasjon (NSO) gjennomførte nyleg ei undersøking blant 1000 studentar der 73 prosent svarte at dei ikkje vil ha eit mobilforbod på forelesingar.
– Til sjuande og sist er studentane vaksne menneske som har ansvar for eiga læring, seier NSO-leiar Eva Franko Aas til NTB.
– Ei bjørneteneste
Aas er heilt samd i at det kan vere gode argument for å ha mobilforbod i både grunnskulen og på vidaregåande skule. Det er likevel noko heilt anna med vaksne studentar.
– Når vi kjem til høgare utdanning, må studentar få lov til å ta både valet og konsekvensane av mobilbruken sjølv, meiner ho.
NSO-leiaren påpeikar at nettopp tidstjuvar er noko ein må bli god på å handtere gjennom livet.
– Eit mobilforbod vil berre gjere studentane ei bjørneteneste. Gjennom heile resten av livet kjem studentane til å møte på konsentrasjonstjuvar og vanskelege val. Høgare utdanning skal førebu oss på dette, ikkje å ta vala for oss.
Måndag og tysdag er det studiestart ved mange universitet og høgskular.
(©NPK)
0 kommentarer