(NPK-NTB): Frp-leiar Sylvi Listhaug leier det klart største partiet i landet, men flest vil ha Jonas Gahr Støre (Ap) som statsminister.

31,3 prosent vil ha Ap-leiar Støre som statsminister, medan 26,7 prosent føretrekkjer Listhaug, viser ei undersøking InFact har gjort for Nettavisen.

Torsdag møtest partileiarane til den første partileiardebatten i haust. Det skjer i Arendal.

Valforskar Troy Saghaug Broderstad ved UiT Noregs arktiske universitet meiner Støre dreg nytte av å vere den einaste reelle kandidaten på raudgrøn side.

– Han samlar derfor opp mykje støtte der. Men legg du saman Listhaug og Søreide, har dei til saman 42,9 prosent mot dei 31,3 prosentane hans, seier Broderstad.

– Sjølv om det går nedover på målingane, så er Støre framleis populær blant veljarane sine, seier han.

Han er overraska over at Listhaugs oppslutning ikkje er høgare. Årsaka er at høgresida ikkje klarer å samle seg om éin kandidat, meiner han.

– Dette var eit problem i valkampen i fjor, og det kjem til å halde fram med å vere det fordi Høgre ikkje kjem til å klare å leggje frå seg ideen om at dei skal ha statsministeren.

Berre 15,2 prosent ønskjer Høgre-leiar Ine Eriksen Søreide som statsminister. 12,1 prosent svarer at dei ønskjer ein annan, medan 14,7 prosent svarer at dei ikkje veit.

(©NPK)