(NPK-NTB): På eitt år har det vorte 150 færre unge uføretrygda, ifølgje Nav. Etter ein periode med kraftig auke fram til pandemiåra har utviklinga flata ut dei siste åra.

Det var 22.300 uføretrygda i alderen 18–19 år ved utgangen av andre kvartal i år, ein nedgang på 150 personar frå året før, ifølgje Nav.

– Eg er glad for at talet på unge uføre flatar ut. Vi treng fleire i jobb, og Arbeidarparti-regjeringa vil ha fleire unge som har slite med å komme seg i aktivitet, ut i jobb eller utdanning, seier arbeids- og inkluderingsminister Kjersti Stenseng (Ap) til NTB.

– Med «ungdomsløftet» garanterer vi at unge under 30 år som står utanfor arbeidslivet, skal få tilbod om jobberfaring, oppfølging eller opplæring. Det er viktig for samfunnet, og ikkje minst for kvar enkelt, seier ho.

Talet på unge uføretrygda svarer til 2,7 prosent av befolkninga i aldersgruppa 18–19 år. Det er 0,9 prosentpoeng høgare enn for ti år sidan, men delen har no vore stabil dei siste tre åra.

– Unge har aldri vore så høgt prioritert i Nav som no, og det er svært positivt å sjå at talet på unge uføre har stabilisert seg og til og med gått litt ned etter perioden med sterk vekst. Vi held fram arbeidet med å hjelpe unge i aktivitet med full styrke, seier arbeids- og velferdsdirektør Hege Nilssen.

Tysdag vart det kjent at det på eitt år også har vorte 4000 færre unge som står heilt utanfor arbeid og utdanning. Utanforskaptala inkluderer både dei som får inntektssikring frå Nav, som uføretrygd, og dei som ikkje har nokon kontakt med Nav.

(©NPK)