I 2025 dekte studiestøtta 77 prosent av eit nøkternt studentbudsjett i Oslo og Bærum, og 85 prosent på landsbasis, ifølgje ein ny rapport frå Samfunnsøkonomisk Analyse, utarbeidd på oppdrag frå Akademikerne.
Til samanlikning dekte studiestøtta i 2002 høvesvis 87 og 94 prosent av dei same utgiftene.
Nær 3500 kroner i minus
På landsbasis manglar ein student som deler ei toromsleilegheit med ein annan student, rundt 1900 kroner i månaden for å få budsjettet til å gå opp.
I Oslo og Bærum er underskotet nær 3500 kroner i månaden. Det er før studenten har brukt pengar på uteliv, reiser eller andre utgifter som ikkje inngår i referansebudsjettet.
Buutgiftene blir trekte fram som den viktigaste forklaringa.
Frå 2002 til 2025 auka studiestøtta med gjennomsnittleg 3,2 prosent i året. I same periode steig bukostnadene med mellom 5,0 og 5,9 prosent årleg.
Tala frå rapporten er henta frå SSBs leigemarknadsundersøking og referansebudsjettet frå Forbruksforskingsinstituttet Sifo.
Vil auke støtta til 1,5 G
I 2026 aukar regjeringa studiestøtta til vel 170.000 kroner, frå 166.859 kroner i 2025. Det gir studentane meir å rutte med, men Akademikerne meiner løftet ikkje er stort nok.
– Studiestøtta må aukast slik at det faktisk er mogleg å vere heiltidsstudent – ikkje berre for dei som får hjelp heimanfrå eller har arbeidskapasitet på 150 prosent, seier leiar Lise Lyngsnes Randeberg i Akademikerne.
Organisasjonen vil setje studiestøtta til 1,5 gonger grunnbeløpet i folketrygda (G), som svarer til rundt 200.000 kroner i året.
For å synleggjere kravet sender Akademikernes studentorganisasjonar, saman med Norsk studentorganisasjon (NSO), ein 1,5 meter høg bokstav G på turné mellom studiestadene ved semesterstart.
Ifølgje rapporten ville ein slik auke dekt 98 prosent av eit nøkternt studentbudsjett på landsbasis og 88 prosent i Oslo og Bærum. Det ville fått studentøkonomien omtrent tilbake til nivået frå 2002.
(©NPK)
0 kommentarer