(NPK-NTB): Elbilar står for ein stadig større del av utvalet av bruktbilar her i landet, ifølgje Finn. Annonsetenesta melder om jamne prisar på bruktbilar gjennom juli.

Snittprisen for bruktbilar markert seld på Finn var 258.400 kroner i juli, opp 0,7 prosent frå juni, og bilane brukte i snitt 29 dagar på å bli selde. Det opplyser annonsetenesta i ein pressemelding.

– Juli stadfestar inntrykket av ein vedhaldande solid bruktbilmarknad. Aktiviteten held seg godt gjennom sommaren, og vi ser ein god balanse mellom tilbod og etterspurnad, seier Terje Dahlgren, marknadsekspert i Finn.

Volvo XC60 var den mest annonserte bilmodellen i juli, framfor Nissan Leaf og to Tesla-modellar – Model Y og Model 3 – som begge låg blant dei fire mest annonserte bilane i landet.

Elbilar utgjorde 33 prosent av alle bruktbilannonsar på Finn i juli, med ein gjennomsnittspris på 348.215 kroner. Talet på elbilannonsar var tilnærma uendra frå juni, ned 0,6 prosent, men andelen stadfestar at elbil no er ein fast del av bruktbilmarknaden, ikkje lenger eit unntak, ifølgje annonsetenesta.

(©NPK)