(NTB-NPK): Ein 19-åring er allereie kjend skuldig i drapsplanar i England. No er tre nye personar tiltalte i same sak i Noreg.

Ifølgje Stavanger Aftenblad skal saka opp i Sør-Rogaland tingrett i haust.

Dei tre tiltalte er frå Stavanger, og ein av dei blir mellom anna skulda for å ha vippsa fleire tusen kroner til 19-åringen som reiste til England. Pengane skal ha komme frå dei som bestilte drapet, ifølgje avisa.

– Slik vi ser på det, er dette tre karar i Stavanger som på ulikt vis har medverka med eit visst bidrag inn mot særleg 19-åringen som reiste til England, seier statsadvokat Geir Evanger.

Tiltalt etter «mafiaparagrafen»

19-åringen vart førre veke kjend skuldig for å ha planlagt eit drap i England. Han vart pågripen på eit hotellrom i Huddersfield nord i England i fjor vår. Han hadde to handvåpen og ammunisjon på rommet.

Politiet meiner at dei tre tenåringane som no er tiltalte, hjelpte 19-åringen med drapsplanane, som vart stansa då han vart pågripen.

Det var ifølgje politiet den svenske kriminelle gruppa Foxtrot som ønskte nokon drept i England. Derfor er dei tre tenåringane tiltalte etter den såkalla «mafiaparagrafen».

Erkjenner ikkje straffskuld

Ifølgje Aftenbladet er ein av dei tre, ein no 19 år gammal mann, tiltalt for å ha vippsa fleire tusen kroner til guten som reiste til England. Ein no 18 år gammal gut er tiltalt for å ha hjelpt han med naudpass, medan ein no 17 år gammal gut er tiltalt for å ha formidla oppdraget.

Evelyn Egeli er forsvarar for 17-åringen.

– Han erkjenner ikkje straffskuld, seier ho.

Heller ikkje 18-åringen erkjenner straffskuld.

– Grunna alderen på den tiltalte og alvoret i saka ønskjer eg ikkje å kommentere han ut over dette per no, seier forsvararen hans, Hans Marius Thorsnæs.

Ørjan Eskeland forsvarer 19-åringen som vippsa pengar:

– Han erkjenner ikkje straffskuld. Argumenta våre vil komme fram i rettssaka, seier han.

(©NPK)