(NPK-NTB): Den siste veka har vore prega av store forseinkingar i togtrafikken. No kallar statsråden inn til hastemøte onsdag formiddag.

Togforseinkingane følgjer etter ein periode med sommarstenging for vedlikehaldsarbeid.

– Det er diverre ikkje uvanleg med oppstartsproblem etter vedlikehaldsarbeid. Men slik det har vore den siste veka, særleg for reisande i Oslo-området – med mange forseinkingar og innstillingar, sånn kan vi ikkje ha det, seier samferdselsminister Jon-Ivar Nygård (Ap) i ein e-post til NTB.

– Difor har eg kalla inn Bane Nor og Jernbanedirektoratet til eit hastemøte hjå meg for ei orientering om kva som har gått gale, og kva tiltak som blir gjennomførte for å redusere moglegheita for at det skjer igjen, seier han.

Mange forseinkingar

Seinast måndag var strekninga mellom Lysaker og Skøyen stengd for togtrafikk på grunn av straumproblem store delar av dagen.

Sundag var det også fem timar med stans ved Skøyen stasjon. Det etter at det oppstod ein feil i signalanlegget på strekninga mellom Nationaltheatret og Skøyen.

Førre veke var det problem med Romeriksporten mellom Oslo og Lillestrøm i starten av veka. Tunnelen opna då etter å ha vore stengd sidan 27. juni på grunn av omfattande vedlikehaldsarbeid.

– Skal ha god kvardag

Nygård trekkjer samtidig fram at regjeringa har prioritert pengar til tog.

– Folk skal ha ein god reisekvardag med tog som kjem og går når dei skal. Difor har Arbeidarparti-regjeringa prioritert meir pengar til vedlikehald og fornying av jernbanen. At vedlikehaldet skjer i sommarferien, gjer at færre pendlarar blir påverka av arbeidet med å forbetre punktlegskapen, seier samferdselsminister Jon-Ivar Nygård (Ap) i ein e-post til NTB.

(©NPK)