– Det er uforståeleg at Norsk Flygelederforening no set i verk ein streik som på heilt urimeleg vis vil ramme flypassasjerar og flytrafikken, seier administrerande direktør i Spekter Anne-Kari Bratten, i Arbeidsgiverforeningen Spekter i ei pressemelding fredag morgon.
Ho understrekar at dei når som helst er innstilte på å ta opp att samtalane med Norsk Flygelederforening for å løyse streiken.
Norsk Flygelederforening hadde på førehand varsla at dei ville ta ut tolv flygeleiarar på Gardermoen og på Flesland i streik frå fredag morgon, dersom ikkje forhandlingane hjå riksmeklaren førte fram.
Partane har sete i lokala til riksmeklar Mats Wilhelm Ruland sidan onsdag formiddag. På overtid natt til fredag vart det likevel klart at partane stod for langt frå kvarandre, og forhandlingane enda med brot.
Er venta store konsekvensar
I første omgang er det berre tolv flygeleiarar ved Flesland og Gardermoen som blir tekne ut i streik på fredag klokka 6.30. Men det vil likevel få store konsekvensar.
Avinor Flysikring har laga ein analyse over korleis streiken kan føre til forseinkingar og kanselleringar dei første fire dagane av streiken.
Dersom streiken etter kvart fører til fare for liv og helse, eller alvorlege samfunnskonsekvensar, kan regjeringa gripe inn og stanse streiken med tvungen lønnsnemnd.
– Årets mest krevjande
Torsdag kveld beskreiv riksmeklar Mats Ruland forhandlingane som ein av dei mest krevjande meklingsrundane i luftfarten i år.
– Vi hadde ein vanskeleg dag i går, og det har vore ein litt betre dag i dag, sa Ruland i 19-tida torsdag.
– Men vi har fleire store uløyste spørsmål som vi skal bruke dei kommande timane på, sa han.
Konflikten dreier seg mellom anna om pausar, rammer for instruktørverksemd og livsfasepolitikk for flygeleiarar.
– Nokre meklingar er meir krevjande enn andre, og denne er i den krevjande delen av skalaen, sa han.
(©NPK)
0 kommentarer