Fagsjef for psykisk helse Eivind Aakhus har delteke i eit prosjekt om eldre og frivillig arbeid. Han er særleg oppteken av eldre menn, som ifølgje senteret er ekstra utsette for einsemd.
– Menn blir trekte mot aktivitetar som stadfestar og held tidlegare ferdigheiter ved like, seier Aakhus.
Han seier menn ofte føretrekkjer aktivitetar der dei arbeider saman om noko, framfor å møtast ansikt til ansikt berre for å snakke.
Aakhus meiner frivillig arbeid kan ha både fysiske og psykiske helsegevinstar. Særleg viktig er moglegheita til å redusere einsemd.
– Og reduserer vi einsemd, blir også risikoen redusert for å utvikle depresjon og potensielt også kognitiv svikt, seier Aakhus.
Han understrekar samtidig at frivillig arbeid ikkje berre handlar om å førebyggje helseproblem, men også om å gje eldre høve til å bruke erfaringa og kunnskapen sin.
– Det er ikkje sånn at pensjonistar er brukte opp; dei fleste har framleis masse energi og verdifull kunnskap dei kan dele, seier han.
(©NPK)
0 kommentarer