(Selma Elise Ekre Leinebø-NTB-NPK) Ein Secret Service-agent med ansvar for visepresidenten i USA J.D. Vances Secret Service-stab er under etterforsking for å ha leke sensitiv informasjon. Det melder Secret Service sjølv i ei pressemelding.

Kommunikasjonssjef i organisasjonen Anthony Guglielmi seier at den administrative granskinga kan bli til ei strafferettsleg etterforsking, utan å oppgi kven det er snakk om eller gi detaljar om etterforskinga. Det melder CBS News.

CNN omtalte tidlegare fredag etterforskinga, basert på anonyme kjelder.

Ifølgje CNNs kjelder har etterforskinga avdekt at ein person kan ha leke informasjon om visepresidenten i USA J.D. Vance.

– Personen er gjenstand for administrativ og potensiell strafferettsleg gransking knytt til påstandar om å ha kompromittert operasjonell og informasjonstryggleik, seier Guglielmi i ei fråsegn.

Han nemner ikkje konkrete døme. Uttalen kjem likevel ei veke etter at nettstaden MS Now siterte kjelder i Secret Service på frustrasjon blant medlemmene av Vances tryggingsvaktteam etter at dei hadde «delt bekymringar internt om at Vance og kontoret hans pressar dei til reiser og oppdrag som nokre agentar reknar som upassande bruk av statlege ressursar samanlikna med tidlegare visepresidentar».

Som visepresident i USA har J.D. Vance og familien hans vern døgnet rundt. Samtidig har Secret Service slite med bemanningsproblem som krev at agentar jobbar mykje overtid. Derfor har det vore bekymringar knytte til Vances personlege og profesjonelle reiseplan om korleis det påverkar dei hundrevis av logistikk- og tryggingspersonell som jobbar med rørslemønsteret hans.

(©NPK)