(NTB-NPK): Dyreparken i Kristiansand sette publikumsrekord i juli. Aldri før har ein halv million gjester besøkt dyreparken på éin månad.

Dyreparken i Kristiansand fyller 60 år i år og feirar med nytt sjimpansehus, ny Kaptein Sabeltann-framsyning – og no også publikumsrekord, skriv dei i ei pressemelding.

På det meste var over 23.000 personar innom Dyreparken på éin dag.

– Det er nesten ubeskriveleg! Vi er utruleg takksame for at så mange valde å leggje ferien til Kristiansand og Dyreparken i juli. Det er ekstra stas at dette skjer i eit år der vi både feirar 60 år og har opna vårt heilt nye sjimpansehus, fortel marknads- og kommunikasjonsdirektør Anniken B. Schjøtt.

Det nye sjimpansehuset skal ha vore ein publikumsfavoritt, og kveldsframsyninga «Kaptein Sabeltann og jakten på den magiske diamant» har vorte spelt for fulle tribunar, ifølgje pressemeldinga.

– Vi gler oss til å ta imot seinsommarens og haustens besøkjande, seier Schjøtt.

(©NPK)