(NPK-NTB): Éin person er død og to er skadde etter ein eksplosjon og brann i eit bygg med fleire leilegheiter på Straume i Øygarden.

Både Bergensavisen og TV 2 siterer innsatsleiar i politiet Ørjan Djuvik på at éin person er død.

Det er ikkje klart om dette er den sakna mannen i tjueåra, som er den einaste personen det ikkje er gjort greie for, men pårørande til den sakna er varsla.

Det er ein ambulansearbeidar og ein bebuar som er skadd, opplyser politiet i politiloggen. Dei er tekne med til traumemottaket på Haukeland universitetssjukehus.

Nødetatane rykte ut etter melding om ein eksplosjon og brann i eit bygg med fire leilegheiter tysdag ettermiddag. Alle nødetatane og luftambulanse rykte ut til staden. Dei beskriv ein kraftig eksplosjon.

– Delar av huset ligg spreidd rundt etter eksplosjonen, seier Tore Fanebust, vaktleiar i 110 Vest, til VG.

Ein sakna

Politiet har kontroll på alle dei registrerte bebuarane, bortsett frå mannen i tjueåra.

– Vedkommande er sakna. Det er starta søk i nærområdet, opplyste Djuvik til Bergens Tidende i 15.30-tida.

Brannvesenet melder no at dei har kontroll på brannen, og at det ikkje er spreiingsfare. Alle dei fire leilegheitene er nedbrende. Likevel melder politiet at dei har sperra av eit parkeringshus i området.

Operasjonsleiar Frode Kolltveit opplyser i politiloggen at det er oppretta ei tryggingssone på 150 meter. Årsaka til eksplosjonen og brannen er førebels ukjend.

Bombegruppa varsla

Djuvik seier til BT at bombegruppa er varsla. Det er uvisst om hendinga er ei ulykke eller ei vilja handling.

Politiet melde først om hendinga like etter klokka 13.30.

(©NPK)