(NPK-NTB-Anne Hagen-Nielsen / Maria Möhring): Tusenvis av sørgjande har strøymt til Slottsparken i Oslo for å heidra kong Harald V etter bortgangen hans fredag. Politiet er førebudd på at heile Slottsplassen blir fylt opp.

– Det kjem til å komma mange, mange menneske i løpet av ettermiddagen og kvelden som ønskjer å visa sin respekt. Vi er førebudde på at heile Slottsplassen blir full, seier innsatsleiar Tomm Berger i Oslo politidistrikt til reporteren til NTB på Slottsplassen fredag ettermiddag.

Han forklarer at dagen har gått som venta frå politiet si side.

– Her inne på Slottsplassen, og alt som har å gjera med døden til kongen, har gått som planlagt og utan nokre hendingar.

– Det skjer jo andre ting i byen, som det alltid gjer, men dersom vi får hendingar tett på området her, er vi førebudde på å handtera det. Vi har godt med ressursar, og vi er godt førebudde, men alt har gått etter planen så langt.

Berger beskriv korleis politiet vil leggja til rette for at så mange som mogleg kan visa sin respekt for den avdøde kongen på Slottsplassen.

– Det er ein veldig spesiell dag for alle i Noreg, for heile byen og også for politifolka som jobbar her. Det er spesielt, men også fint at ein kan vera til stades og gjera ein jobb og leggja til rette for at alt som skjer framover, skal gå føre seg sikkert og verdig, så så mange som vil kan ta del i sorga, seier han til NTB.

(©NPK)