(NPK-NTB): Det er påvist fugleinfluensa hos ein isbjørn som vart funnen død på nordenden av Spitsbergen på Svalbard. Det er det andre kjende tilfellet hos isbjørn i Noreg og Europa.

Det dreier seg om H5N5, ein undervariant av høgpatogen, altså sterkt sjukdomsframkallande, fugleinfluensa (HPAI).

Viruset er påvist fleire gonger tidlegare hos andre dyr på Svalbard. Fugleinfluensa vart påvist hos villfugl i 2022, ein kvalross året etter, fjellrevar i 2025 og hos ein annan isbjørn og ein kvalross i vår.

Liknande fugleinfluensavirus er også påvist hos rovdyr på fastlandet etter smitte frå villfugl.

Bjørnen vart funnen død på Æøya, som ligg nær Virgohamna. Det vart teke prøver av han i juni etter dei tidlegare virusfunna hos isbjørn og kvalross. Distansen mellom funna er rundt 23 kilometer, opplyser Veterinærinstituttet.

Virusfunna følgjer ei utvikling der høgpatogene fugleinfluensavirus i større grad blir påviste hos europeiske pattedyr, slår fugleinfluensakoordinator i Veterinærinstituttet Ragnhild Tønnessen fast.

– Samtidig har viruset dei siste åra spreidd seg til nye område, inkludert Arktis, der det kan få konsekvensar for sårbare bestandar og økosystem, seier ho.

(©NPK)