(NPK-NTB-Reuters): Ein lagerbygning tilhøyrande den russiske netthandelgiganten Wildberries står i brann i regionen Tula like sør for Moskva.

Ein person er såra i brannen, som vart utløyst av eit ukrainsk droneangrep, seier regionale styresmakter natt til onsdag.

I tillegg er to industrianlegg i Novomoskovsk og Uzlovaja øydelagde i angrep, og dessutan to bustadbygningar i ein annan del av Tula-regionen, kjem det fram av ei fråsegn frå guvernør Dmitrij Miljajev.

Wildberries stadfesta kort tid etter at lageret i Tula er øydelagt i angrepet.

Ukrainske styrkar har sidan midten av juli angripe rundt 20 av lageranlegga tilhøyrande Wildberries, Russlands største netthandelselskap. Ukrainarane hevdar at det via Wildberries, som blir kalla Russlands Amazon, blir dronar og anna militært utstyr selt til russiske soldatar.

(©NPK)