(NPK-NTB): Podkasten «Sterke historier med Tore Strømøy» har vorte klaga inn til Pressas faglege utval, melder Medier24.

Klaga kjem etter episoden «Ragnhild ble svartelistet på Coop – måtte kjøre seks mil for melk og brød».

Det er Medier24 som har fått innsyn i klaga.

Klagaren er son av den no avdøde butikksjefen i den aktuelle Coop-butikken. Sonen meiner Strømøy bryt fire punkt i Ver varsam-plakaten – Norsk presseforbunds etiske regelverk for redaktørstyrte medium.

Klaga gjeld punkta 3.2 om kjeldekritikk, 3.9 om å opptre omsynsfullt, 4.1 om saklegheit og omtanke, og 4.14 om samtidig imøtegåing. Ifølgje sonen gir episoden ei skeiv framstilling av konflikten som oppstod mellom Coop og kunden. Han reagerer også på tidspunktet for publiseringa.

«Det sentrale presseetiske spørsmålet er ikkje om intervjuobjektet hadde rett til å fortelje historia si, men om redaktøren i tilstrekkeleg grad undersøkte påstandane historia byggjer på», skriv sonen.

«Når redaktøren vel å publisere alvorlege skuldingar mot en identifiserbar person som nyleg er gått bort, blir etter mitt syn krava til saklegheit og omtanke skjerpa», heiter det vidare.

Det er Strømøy sjølv som er redaktør for podkasten.

– Eg er redaktør for podkasten «Sterke historier», og denne gongen er alle journalistiske val og vurderingar gjorde av meg sjølv. Så gjer eg feil, har eg berre meg sjølv å skulde på, seier Strømøy.

(©NPK)