(NPK-NTB-Isabel Bech/Are Føli): Kriminelle aktørar er sentrale hos fleire private leverandørar av barnevernstenester, ifølgje ei kartlegging. Ei rekke av partia på Stortinget reagerer sterkt og krev omfattande tiltak.

– Barna våre skal vera trygge når dei møter barnevernet, anten det er gjennom eit hjelpetiltak i kommunen eller på institusjon. Då er det openbert at personar med kriminell tilknyting ikkje har noko der å gjera som tilsette eller eigarar. Dette skal ryddast opp i, seier barne- og familieminister Lene Vågslid (Ap).

A-krimsenteret i Tønsberg har undersøkt 16 private barnevernsføretak i Sør-aust politidistrikt, altså Buskerud, Vestfold og Telemark. Kartlegginga viser at kriminelle aktørar har sentrale roller i fleire slike private barnevernsføretak.

Regjeringa fekk lagt fram rapporten i juni, og onsdag møtte Vågslid pressa for å fortelja om den saman med A-krimsenteret, Økokrim og justis- og beredskapsminister Astri Aas-Hansen (Ap).

Éin barnevernsinstitusjon har mista godkjenninga etter kartlegginga, noko VG skreiv om måndag. Barna som budde der, er flytta.

Alvorlege funn

– Analysen viser alvorlege funn. Den viser risiko for at kriminelle nettverk får ansvar for sårbare barn og unge. Og han viser risiko for at i utgangspunktet lovlege inntekter frå velferdstenester går til kriminelle nettverk, sa Økokrim-sjef Pål Lønseth på pressekonferansen.

Funna i analysen er eit døme på noko politiet har varsla om i lang tid: at kriminelle bruker lovleg verksemd som dekke for å gjera seg skuldige i kriminalitet, påpeika Lønseth.

Manglande informasjonsflyt mellom ulike etatar blir trekt fram som ei sentral utfordring. Rapporten har avdekt dokument med feilaktig informasjon, bruk av ikkje-kvalifisert arbeidskraft og stråpersonverksemd.

– Kriminelle nettverk er ute etter profitt og prøver å utnytta alle sårbarheitene dei finn i systema. Vi har sett at aktørar har utnytta barnevernsfeltet i Sverige, og no ser vi også indikasjonar på det i Noreg, seier Lønseth i ei pressemelding.

– Mange åtvaringar

Frå politisk hald er reaksjonane mange og kraftige.

Både Raudt og SV meiner at kommersielle aktørar må ut av velferda.

– Regjeringa har fått mange åtvaringar, mellom anna av sitt eige avkommersialiseringsutval for to år sidan, seier Marie Sneve Martinussen i Raudt i ei fråsegn.

Staten har svikta totalt, meiner Marian Hussain i SV.

– Barn har vorte sende rett i hendene på hallikar og andre kriminelle, det er ei skam, seier ho.

Høgre meiner dagens barnevern er for fragmentert og krev at regjeringa no byggjer det opp på nytt for å ta tilbake kontrollen.

– Det hastar, seier Tone Wilhelmsen Trøen.

Venstre ber kontroll- og konstitusjonskomiteen om å gå inn i saka.

– No må to ting skje samtidig. Barna i dei ramma verksemdene må sikrast først, før noko anna. Og Stortinget må få vita kva departementet visste, og kvifor dette ikkje vart stansa, seier nestleiar Ingvild Wetrhus Thorsvik.

Samtidig meiner Jon Helgheim i Frp at regjeringa burde ha lært av Sverige.

– Kriminell infiltrering via institusjonar har vore eit velkjent problem i Sverige, noko ein burde ha lært av, og som ein kunne forhindra i Noreg, seier han.

– Dei fleste er seriøse

NHO Geneo, som mellom anna representerer barnevernbransjen, understrekar at dei aller fleste private aktørane er profesjonelle og driv seriøst.

– Det er uakseptabelt dersom det stemmer at kriminelle nettverk opererer innanfor barnevernsbransjen, som skal vera til for dei mest sårbare barna og unge i samfunnet vårt, seier Torbjørn Furulund, bransjedirektør for barnevernsbransjen i NHO Geneo.

Fellesorganisasjonen, som organiserer mange barnevernstilsette, har frykta nettopp det som no er avdekt.

– Dette er så alvorleg at det nesten er uverkeleg. Samtidig er det nøyaktig den røyndommen vi har frykta ligg under overflata. Dette er det vi har åtvara mot når andre seier at dei «vil sleppe alle gode krefter til». Barnevernstenester er ikkje eigna som ein marknad for private kommersielle aktørar, seier leiar Marianne Solberg.

Det var Klassekampen som måndag avslørte koplingane til kriminelle etter å ha fått tilgang til delar av rapporten frå A-krimsenteret.

(©NPK)