Gjennom første halvår i 2026 har nordmenn spart heile 38 milliardar kroner i fond, viser tal frå Verdipapirfondenes forening (VFF). Det er meir enn i heile 2025.
Dei 38 milliardane fordeler seg med 18,4 milliardar kroner i aksjefond, og 18 milliardar kroner i rentefond. Rentefond har altså vorte nesten like populært som aksjefond, ifølgje VFFs oversikt.
– Dette er noko vi ikkje har observert før. Det er rekordhøg nettosparing i rentefond, seier administrerande direktør Bernt Zakariassen i VFF til kanalen.
Utviklinga er ein konsekvens av dei endra skattereglane for skattlegging av verdipapir, meiner han. Frå og med nyttår i år betaler ein nemleg ikkje skatt på fondsandelar før ein sel dei.
– Dei nye reglane gjer at du ikkje betaler skatt før du innløyser andelane dine, medan du tidlegare vart løpande skattlagd, forklarer Zakariassen.
Det høge rentenivået er endå ein faktor som trekkjer sparekundane mot rentefond, meiner spareøkonom Else Sundfør i Nordnet.
– Har du eit høgt rentenivå, så får du også ei god avkastning til ein lågare risiko enn du ville gjort i aksjefond. Derfor blir det veldig populært å setje pengane i rentefond, meiner ho.
I rekordåret 2025 sparte norske personkundar 31,9 milliardar kroner, viser VFFs tal. Denne rekorden er altså slått allereie i juli. Det er i dag over 2,1 millionar nordmenn som sparer i fond.
(©NPK)
0 kommentarer