(NPK-NTB-AFP): Marokko seier Spania vart åtvara om at migrantar kunne prøve å komme seg til Ceuta etter ei spansk rettsavgjerd om migrasjon.

Ein høgtståande marokkansk tenestemann seier at dei åtvara spanske styresmaktene om at ei rettsavgjerd kom til å skape eit problem. Ho går etter seiande ut på at migrantar som kjem sjøvegen, ikkje ville bli returnerte med ein gong.

Førre veke tok rundt 60.000 menneske, dei fleste marokkanarar, seg inn i den spanske eksklaven Ceuta til fots eller ved å symje frå den nærliggjande byen Fnideq.

Den store og plutselege tilstrøyminga skapte kaotiske forhold i Ceuta og utløyste eit politisk rabalder i EU. Dei fleste har i dag returnert til Marokko.

Spanias høgsterett avgjorde 8. juli at migrantar som kjem sjøvegen, ikkje skal returnerast like raskt som andre. Spanske styresmakter har gitt kriminelle gjengar og menneskesmuglarar skulda for å spreie feilinformasjon om avgjerda.

Den marokkanske tenestemannen, som ønskjer å vere anonym, opplyste til AFP at dei tok kontakt med den spanske sida då sosiale nettverk byrja å spreie informasjonen.

– Vi diskuterte denne avgjerda og konsekvensane. Vi forklarte at ho kom til å skape eit problem. Og det gjorde ho, understrekar han.

Han seier også at den store folkerørsla inn i Ceuta ikkje var eit teikn på svikt i Marokkos tryggingsapparat.

– Det er for enkelt å seie at Marokko berre burde ha brukt makt for å stoppe dei. Det er å fullstendig misforstå dette fenomenet, sa han.

Tenestemannen meiner det ikkje er Marokkos ansvar åleine å handtere migrasjon, og påpeikar at kostnadene for migrasjonsforvaltninga i landet utgjer rundt 500 millionar euro i året.

(©NPK)