(NPK-NTB): Kong Haralds helsetilstand er forverra og er no svært alvorleg, opplyser Kongehuset. Nesten heile familien er torsdag formiddag samla på sjukehuset.

– Kongen si helse er forverra. Helsetilstanden er svært alvorleg, heiter det i ei kort oppdatering frå kongehuset torsdag morgon.

Både kronprins Haakon og dronning Sonja avlyser heile programmet sitt, opplyser kongehuset.

Torsdag formiddag er både dronninga og kronprinsparet på Rikshospitalet. Også prins Sverre Magnus har komme til sjukehuset. Det same har kong Haralds storesøster, prinsesse Astrid, medan prinsesse Ingrid Alexandra også er på veg til sjukehuset.

Mange besøk på sjukehuset

Dei siste dagane har fleire medlemmer av familien besøkt kongen.

I helga og førre veke blei både dronning Sonja, kronprinsparet, prinsesse Märtha Louise, søster til kongen prinsesse Astrid og fleire av barnebarna, inkludert prinsesse Ingrid Alexandra, observert på sjukehuset. Dronninga var på besøk også tysdag.

Innlagt 17. august

Kong Harald blei lagd inn på Rikshospitalet 17. august. Han hadde fått kortisonbehandling for hemolytisk anemi, ein tilstand som førte til væskesamling som måtte behandlast på sjukehus. Hemolytisk anemi er ein tilstand der dei raude blodlekamane har kortare levetid enn normalt. Dette kan føre til låg blodprosent, altså anemi.

Førre helg opplyste kongehuset at helsetilstanden til kongen hadde forverra seg i løpet av helga. No har altså tilstanden forverra seg ytterlegare.

God kontakt mellom Slottet og SMK

– Det er god kontakt mellom Slottet og Statsministerens kontor, sa statsminister Jonas Gahr Støre til NRK onsdag.

Han understreka likevel at han får dei same oppdateringane om helsesituasjonen til kongen som resten av folket får.

– Det er ein situasjon der kongen blir teken godt vare på. Han får god behandling. Det er ein alvorleg situasjon å vere på sjukehus, og vi følgjer med på det, seier Støre og legg til:

– Vi ønskjer av heile vårt hjarte kongen god betring og all mogleg framgang i situasjonen han er i.

Skulle på fylkestur

Kongeparet manglar fire kommunar før dei har besøkt alle kommunane i landet. Same dag som kongen blei innlagd, opplyste Slottet om at kongeparet skulle på besøk til Siljan og Nissedal kommune i Telemark i oktober.

I september skulle etter planen kongeparet på fylkestur til Trøndelag for å besøkje dei siste to kommunane dei mangla der. Dette besøket har blitt avlyst.

Innlagt på Tenerife og i Malaysia

Så seint som i februar var kongen innlagd på sjukehus på Tenerife, der han blei behandla for ein infeksjon og dehydrering. Han var innlagd i to dagar før han blei skrive ut og kunne halde fram ferien på den spanske ferieøya.

Også under eit opphald i Malaysia i 2024 blei han sjukehusinnlagd med ein infeksjon, og han fekk i etterkant operert inn pacemaker.

(©NPK)