(NPK-NTB): Polen krev at Meta straks gjer meir for å bli kvitt svindel og falske annonsar. Sør-Korea meiner selskapet må skjerpe innsatsen over heile verda når det gjeld avhengnaden til unge.

Meta eig dei sosiale media Facebook og Instagram og dessutan meldingstenesta WhatsApp.

Utspela kjem dagen etter at selskapet inngjekk forlik med 29 amerikanske delstatar etter at dei skulda det for å manipulere unge brukarar og misbruke persondata.

Polens digitaliseringsminister Krzysztof Gawkowski opplyser i ei melding på X at han har bede EU-kommisjonen gi Meta ei bot på 250 millionar euro – tilsvarande 2,7 milliardar kroner.

Torsdag fastslo Sør-Koreas mediekommisjon at Metas tiltak for å gi unge brukarar betre vern bør gjelde over heile verda, ikkje berre i nokre land.

Metas forlik i USA inneber at selskapet må betale nesten 17 milliardar dollar (156 milliardar kroner) til delstatane, og dessutan setje i verk tiltak for å avgrense unges bruk av sosiale medium.

Det skal mellom anna gjerast med daglege tidsavgrensingar og nattlege sperringar for unge brukarar, ifølgje rettsdokument. I tillegg må dei styrkje innsatsen for å verifisere alderen på brukarane.

(©NPK)