(NPK-NTB): Leiaren for EU-kommisjonen hadde med seg 200 millionar euro til investeringar på Grønland, men det er ikkje snakk om at den danske øya skal bli EU-medlem, ifølgje Grønlands regjeringsleiar.

Sjølv om Danmark er med i EU, er ikkje Grønland det, etter at øya tok avgjerda om å gå ut av det dåverande EF i 1985.

Regjeringsleiar Nielsen seier at han ikkje ønskjer å gjere om på avgjerda frå 1985.

– Grønland har same haldning som før, og vi har eit partnarskap med EU. Det ønskjer vi å byggje vidare på og gjere meir strategisk og sterkare, seier han.

– Men ein medlemskap er ikkje noko som ligg på bordet, legg regjeringsleiaren til.

Måndag underteikna leiaren for EU-kommisjonen, Ursula von der Leyen, Grønlands regjeringsleiar Jens-Frederik Nielsen og Danmarks statsminister Mette Frederiksen ei felles erklæring om utvida samarbeid. EU vil investere 200 millionar euro – vel 2 milliardar kroner – på mellom anna satellittdrive internett, kritiske råvarer og energiprosjekt på Grønland.

Erklæringa utvidar samarbeidet samanlikna med den førre felles erklæringa frå 2015.

(©NPK)