(NPK–NTB): EU vil investera 200 millionar euro – vel 2 milliardar kroner – i mellom anna satellittdrive internett, kritiske råvarer og energiprosjekt på Grønland.

Måndag underteikna leiaren for EU-kommisjonen, Ursula von der Leyen, Grønlands regjeringsleiar Jens-Frederik Nielsen og Danmarks statsminister Mette Frederiksen ei felles erklæring om utvida samarbeid.

– Grønland kan rekna med EU, var von der Leyens bodskap på eit pressemøte i etterkant. Der kunngjorde ho finansieringspakken på 200 millionar euro for i år og neste år.

Pengane skal mellom anna brukast til å styrkja internettsambandet til avsidesliggjande regionar på Grønland via satellitt. EU vil også investera på to andre strategisk viktige område: Kritiske mineral og fornybar energi. I tillegg skal det byggjast fleire bustader og satsast på turisme.

Formålet er å styrkja dei økonomiske banda mellom EU og den arktiske øya, som USAs president Donald Trump har erklært at han vil ha.

– Grønlands framtid er opp til grønlendarane å avgjera. Ingen andre, slår von der Leyen fast.

På pressemøtet viste ho også til EUs nye Arktis-strategi, som er venta i haust.

– Territorial rett og suverenitet er fundamentale prinsipp i internasjonal rett, legg ho til.

Grønland er ein sjølvstyrt del av Kongeriket Danmark.

– Grønland treng EU, og EU treng Grønland, seier Jens-Frederik Nielsen.

(©NPK)