(NPK-NTB): Forbrukarrådet krev at norske bileigarar får tilbake rundt 300 millionar kroner i det dei meiner er ulovlege parkeringsgebyr.

Onsdag startar eit massesøksmål mot innkrevjingsselskapet Riverty i Oslo tingrett, skriv Motor. Fleire hundre tusen bileigarar er omfatta av saka.

– Vi anslår at søksmålet omfattar over fem millionar potensielle tilbakebetalingskrav med eit samla krav på rundt 300 millionar kroner, opplyser Ragnhild Løseth, leiar for juridisk eining i Forbrukarrådet.

Riverty har kravd inn pengar på vegner av mellom anna Onepark, Apcoa og Aimo Park. Gebyra har vorte lagde til fakturaer for uteståande parkeringsavgifter. Forbrukarrådet meiner gebyra har vore for høge og dermed i strid med finansavtalelova.

Riverty avviser kravet og meiner Forbrukarrådet har saksøkt feil selskap.

– Riverty er eit finansieringsselskap, og vi har argumentert for at selskapet ikkje er rett part i gruppesøksmålet. Kritikken i gruppesøksmålet rettar seg mot prismodellar og produktutforming i parkeringsmarknaden. Dette ansvaret ligg hos parkeringsselskapa. Vi har hatt tillit til at dei har operert innanfor lova, seier administrerande direktør Kjell-Rune Birkelund i Riverty Noreg.

Dersom Forbrukarrådet vinn fram, kan Riverty måtte betale tilbake gebyra til dei ramma bileigarane.

(©NPK)