(NPK-NTB): Meklinga mellom flygeleiarane og arbeidsgivarane går framleis føre seg torsdag kveld. Blir ikkje partane samde innan midnatt, kan det få konsekvensar for flytrafikken fredag morgon.

– Vi hadde ein vanskeleg dag i går. Det har vore ein betre dag i dag, men vi har fleire uløyste spørsmål som vi skal bruke dei kommande timane på, sa riksmeklar Mats Wilhelm Ruland i NRKs Dagsrevyen torsdag kveld.

Konflikten dreier seg mellom anna om pausar, rammer for instruktørverksemd og livsfasepolitikk for flygeleiarar, ifølgje leiar Robert Gjønnes i Norsk Flygelederforening, som uttalte seg til NTB før meklinga starta onsdag formiddag.

– Nokre meklingar er meir krevjande enn andre, og denne er i den krevjande delen av skalaen, sa Ruland.

(©NPK)