(NPK-NTB): Ein nordmann i 20-åra som har vore etterlyst etter at han ikkje møtte til soning av dom for mishandling, er pågripen i Thailand.

Det melder NRK.

Han skal ha vore internasjonalt etterlyst gjennom Interpols Red Notice-system.

Søndag 9. august vart han pågripen av thailandske immigrasjonsstyresmakter, som spora han opp til ein landsby, opplyser dei i ei pressemelding.

Gjennom etterforskinga oppdaga immigrasjonsstyresmaktene også at han skal ha overskride visumperioden med 267 dagar.

Mannen i 20-åra vart i 2025 dømd til fengsel i fire år av Gulating lagmannsrett for mishandling av den dåverande sambuaren sin. Det var ei fellesstraff etter at han vart dømd til fengsel for fleire andre forhold i 2020.

– Han unndrog seg soning og vart internasjonalt etterlyst av Vest politidistrikt. Han er no pågripen og blir transportert til Noreg for soning av dommen, skriv politiinspektør Janne Ringset Heltne i Vest politidistrikt i ein e-post til NRK.

Mannen nekta straffskuld under rettssaka og anka til Høgsterett. Ifølgje Heltne vart anken nekta fremja, slik at dommen er rettskraftig.

Advokat Torbjørn Sognefest i Elden Advokatfirma forsvarte mannen i lagmannsretten. Han ønskjer ikkje å kommentere saka.

(©NPK)