(NPK-NTB): Oslo kommunes forslag til korleis byen skal utvikle seg dei neste 15 åra skaper reaksjonar hos Riksantikvaren, som er bekymra over ambisjonane om stadig fleire høghus.

– Det er historielaust at formålet i kommuneplanen ikkje seier noko om å ta vare på den rike arven til Oslo og hovudstaden, seier riksantikvar Hanna Geiran i ei pressemelding.

Dei har sendt inn ei innvending på ni punkt til Oslos forslag til kommuneplan.

Der går dei hardt ut mot Oslo kommunes plan, som dei meiner ikkje synleggjer kulturmiljøet i tilstrekkeleg grad i framtidsvisjonen sin for byen. Dei viser mellom anna til at det er opna for høghus på 125 meter i området rundt Oslo S.

– Det er eit tankekors at toppen av skyskraparane vil liggje på høgde med Sinsenkrysset, seier Geiran.

Bekymra for fleire høghus

Geiran understrekar at Oslos eldre kulturmiljø må vere attraktive å opphalde seg i.

– Slagskuggen av så høge bygningar aust for Oslo S vil leggje seg rundt 380 meter over austkanten og Grønland på ein sommarettermiddag i slutten av august, legg ho til.

Riksantikvaren reagerer også på at det i Oslo kommunes planforslag blir opna for fleire høghus i Nydalen, Skøyen og langs Ring 1.

– Planen kan setje i gang eit stort transformasjons- og rivepress i område med viktige kulturmiljøverdiar. Vi meiner at utviklinga bør baserast på vidareføring og gjenbruk av eksisterande busetnad, seier Geiran.

Har trua på løysing

Innvendingsinstituttet er ei ordning som skal sikre nasjonale og regionale interesser i arealplanlegginga.

Byråd Anita Leirvik North for byutvikling i Oslo kommune meiner kommunalministeren må gjere ein gjennomgang av ordninga slik at ikkje kommunane må forhalde seg likt til alle innspel som kjem frå staten og la dei stoppe nødvendig utvikling i årevis.

– Politikarar må vekte svært mange interesser opp mot kvarandre, ikkje minst i område der det er levande historie, slik som i Oslo sentrum. Også nasjonalt må vi kunne vente ei politisk vekting av interessene, skriv North til NTB.

– Eg meiner Oslo skal klare å finne løysingar der vi både fortettar rundt knutepunkt og tek vare på dei interessene som allereie er der. Dei sonene som er lagde i arealdelen i kommuneplanen er ikkje finteikningar, men grove avgrensingar om kvar det kan vurderast høghus.

(©NPK)