(NPK-NTB-AP): Ein amerikansk dommar har avvist Ghislaine Maxwells forsøk på å få gjort om dommen ho fekk for å ha skaffa mindreårige jenter til Jeffrey Epstein.

Dommaren Paul Engelmayer slår i rettsavgjerda si fast at den føderale dommen frå 2021, som er på 20 års fengsel, blir ståande.

Den 64 år gamle Maxwell, som representerte seg sjølv i saka, hevda mellom anna at mange av dei offentleggjorde Epstein-dokumenta har bidrege til å svekkja rettstryggleiken hennar.

Dette fordi advokatar som representerer dei fornærma i Epstein-saka, ifølgje henne har fungert som aktorat og agentar for amerikanske styresmakter.

Engelmayer avviste denne argumentasjonen.

Finansmannen Jeffrey Epstein vart i 2008 dømd til 13 månaders fengsel for sexkjøp av ei mindreårig jente.

I 2019 vart han pågripen på nytt og tiltalt for å ha forgripe seg seksuelt på fleire titals mindreårige jenter tidleg på 2000-talet. Det skjedde med hjelp frå Maxwell.

Epstein vart funnen død i fengselscella si nokre veker etter pågripinga, og det blir opplyst at dødsårsaka er sjølvmord.

(©NPK)