(NTB-NPK): Minst fire jordskjelv vart registrerte vest for Helgelandskysten onsdag kveld. Det kraftigaste hadde ein styrke på 4,3.

Det første skjelvet vart registrert rundt klokka 22.55 norsk tid. Omtrent 12 minutt seinare, klokka 23.06, kom det største skjelvet.

Dette skjelvet hadde ei berekna djupn på 10 kilometer, ifølgje Det europeiske jordskjelvsenteret EMSC. Episenteret låg i havet rundt 32 kilometer vest for Ørnes i Meløy kommune, ifølgje dei førebelse målingane. Kommunen ligg midt i Nordland fylke.

Norsar seier episenteret er lokalisert rundt 45 kilometer vest for Ørnes og at djupna er rundt 14 kilometer.

Både styrken og lokaliseringa er usikre og kan bli justerte ytterlegare, opplyser Norsar, som følgjer aktiviteten i området.

Førebelse analysar reknar styrken til 3,2 på det første skjelvet. To mindre skjelv til vart registrerte rundt klokka 23.19 og 23.23, med førebels styrke på høvesvis 1,5 og 2,5.

Norsar understrekar at resultata er førebelse, og at både styrken og lokaliseringa av skjelva kan bli justerte når fleire seismiske data er analyserte.

Tipsarar seier til VG at skjelvet vart merkt både i Sandnessjøen, Mosjøen, Mo i Rana, Nesna, Bodø og Fauske.

Jordskjelvet som skaka Oslo-området og Austlandet i april hadde ein styrke på 3,6, ifølgje Norsar.

Norsar opplyser at det har vore jordskjelv i dette området i Nordland fleire gonger tidlegare. Dei siste 25 åra er det registrert rundt 22 jordskjelv innanfor 100 km av episenteret til hovudskjelvet. Det største skjelvet i denne perioden hadde ein styrke på rundt 4 og hende 8. november 2023, omtrent 38 km frå dagens hending.

(©NPK)