(NPK-NTB-AFP-Reuters): Syrias tidlegare president Bashar al-Assad er dømd til døden in absentia i heimlandet. Han er i eksil i Russland.

Også Assads yngre bror, Maher Assad, og fetteren hans vart tysdag dømde til døden i ein syrisk domstol.

Fetteren Atef Najib var fysisk til stades i retten då dommen fall.

Begge Assad-brørne vart funne skuldige i krigsbrotsverk og brotsverk mot menneskeslekta under den 14 år lange borgarkrigen.

Najib, som var ein av dei militære leiarane i regimet, er dømd for å ha slege brutalt ned på opposisjonelle i Deraa-provinsen i forkant av borgarkrigen.

Assad vart styrta og tvinga til å rømme frå landet i desember 2024. Opprørarar, mange av dei islamistar, tok då over makta under leiing av presidenten i dag, Ahmed al-Sharaa.

Assad flykta med familien sin til Moskva, der dei etter alt å dømme har opphalde seg sidan. Det same gjorde bror hans.

Dommane tysdag er dei første mot medlemmer av Syrias tidlegare regime. Rettsprosessane starta i byrjinga av året, både mot personar som fysisk er til stades i retten og personar som har flykta til utlandet.

(©NPK)