Store delar av mange av Europas største elvar har krympa til det lågaste nivået nokosinne registrert i juli månad.

Rekordlåge gjennomsnittlege vassføringar vart observerte langs 95 prosent av dei overvakte strekningane av Themsen i England, 85 prosent av Rhinen og rundt to tredelar av Donau, viser ein AFP-analyse av data frå EUs klimaovervakingsteneste Copernicus.

Det er dei svakaste julimålingane sidan 1992, då dei første målingane vart registrerte.

Vasstanden i elva Rhône er på sitt lågaste nivå langs rundt 30 prosent av elveløpet. Det same gjeld Po, Italias lengste elv, der omtrent 40 prosent av løpet ligg på eit historisk lågt nivå.

Rhinen har lege på det mest alvorlege tørkenivået nesten samanhengande sida byrjinga av juni langs store delar av elveløpet, ifølgje data frå EUs tørkeovervakingsteneste (EDO).

Donau vart også hardt ramma, særleg langs den ungarske strekninga. Den låge vasstanden tvinga den ungarske regjeringa til å nesten stenge det einaste kjernekraftverket i landet, som er avhengig av vatn frå elva for å kjøle ned atomreaktoren. På det verste vart drifta av kraftverket, som normalt leverer rundt halvparten av Ungarns straum, redusert til 10 prosent.

Det dramatiske fallet i vasstand kjem etter at Vest-Europa opplevde ein historisk varm tidleg sommar, prega av gjentekne hetebølgjer, vedvarande tørke og øydeleggjande skogbrannar som forskarar knyter direkte til klimaendringar.

Varmerekordar fleire stader i Vest-Europa har vorte slått opptil fleire gonger i løpet av sommaren.

(©NPK)