(NTB-NPK) Også på høgresida er det usemje om avgiftskutta på drivstoff burde førast vidare. Høgre-leiaren går hardt ut mot Framstegspartiets standpunkt i saka.

– Frp opnar døra på vidt gap for at Stortinget løpande skal kompensere prisane på drivstoff, mat og energi. Det er ikkje berre kortsiktig – det er uansvarleg, seier Høgre-leiar Ine Eriksen Søreide til VG.

Bakgrunnen er at Framstegspartiet krev at avgiftskutta på drivstoff skal halde fram ut året. På raudgrøn side har partia sete i møte torsdag for å diskutere saka. Dei held fram fredag.

Søreide meiner at det er eit betre alternativ med skattekutt for alle. Framstegspartiet kjenner seg ikkje igjen i kritikken.

– Vanskeleg for å ta det på alvor

– Eg har nesten vanskeleg for å ta det Høgres nye leiar seier på alvor. Framstegspartiet vart stifta for å redusere skattar og avgifter, og vi har i dei alternative statsbudsjetta våre foreslått mykje større skattelettar enn Høgre, seier Frp-leiar Sylvi Listhaug til VG.

Også Senterparti-leiar Trygve Slagsvold Vedum reagerer på at Høgre vil fjerne avgiftskutta for drivstoff frå og med 1. september.

– Dette er klassisk sentraliseringspolitikk frå Høgre. I byane kan nokon velje T-bane eller trikk. Men i store delar av Noreg finst ikkje det valet. Då blir auka drivstoffavgifter ei straff for å bu, jobbe og drive næring utanfor dei største byane, seier Vedum.

Senterpartiet meiner drivstoffavgiftene ikkje skal auke.

– Vi vil redusere avgifter som rammar folk flest. Auka avgifter er ei oppskrift for sentralisering av Noreg og større forskjellar i Noreg, seier Vedum.

Kan støtte kutt i ein krisesituasjon

Berre i ein krisesituasjon vil det vere aktuelt for Søreide å støtte avgiftskutta.

– Skulle vi hamne i ein akutt situasjon igjen, som kan vere allereie om veker eller månader, står Høgre klare til å ta ansvar når Arbeidarpartiet ikkje gjer det, seier Søreide.

På raudgrøn side meiner Arbeidarpartiet, Sosialistisk Venstreparti og Miljøpartiet Dei Grøne at drivstoffprisane i sommar ikkje tilseier behov for forlenging av avgiftskutta. Raudt er litt meir open for forlenging. Senterpartiet ønskjer forlenging i avgiftskutt både for bensin og diesel, understrekar Vedum.

(©NPK)