(NPK-NTB-DPA) I USA gjer arbeidsmarknaden det betre enn venta. Det kan påverke rentenivået både i USA og i Noreg, ifølgje sjeføkonom.

– Tala gjer det meir sannsynleg at den amerikanske sentralbanken vil setje opp renta på sitt neste møte om eit par veker. Det kan også gjere situasjonen vanskelegare for Noreg, seier Kyrre Knudsen, sjeføkonom i SpareBank 1 Sør-Noreg.

Ifølgje ein rapport frå det amerikanske arbeidsdepartementet publisert fredag har sysselsetjinga i USA auka langt meir enn økonomar hadde venta i august. Departementet opplyser at arbeidsløysa i USA har halde seg på 4,1 prosent, same nivå som i juli. Økonomar hadde venta at arbeidsløysa ville stige til 4,2 prosent.

Mellom anna har sysselsetjinga utanfor jordbruket stige med 162.000 arbeidsplassar i august mot ei forventing på 55.000. Resultatet har også styrkt den amerikanske dollaren, og ifølgje nyheitsbyrået Reuters er renteheving på bordet.

– Dersom det går svært godt i amerikansk økonomi og rentene blir sett opp der, kan det også påverke norske renter, seier Knudsen.

På plattforma Truth Social skriv USAs president Donald Trump at han vil stanse handelen med enkelte land dersom sentralbanken ikkje senkar renta.

– Senk renta eller så stoppar eg handelen med land vi har underskot med, skreiv Trump på plattforma fredag.

(©NPK)