(NTB-NPK): Mannsideal, fellesskap og valet i Sverige er heite tema når dei skandinaviske søsterpartia møtest til panelsamtale på sommarleiren til AUF på Utøya.

– Vi må gå til kulturkrig om mannsidealet, seier Danmarks finansminister Peter Hummelgaard (S).

På Utøya møtest nestleiar i Arbeidarpartiet Tonje Brenna, Sveriges tidlegare statsminister Stefan Löfven (S) og Hummelgaard i ein panelsamtale med namnet «Val i verda – kven vinn, og kvifor? Kampen mot ekstremismen».

– Mannsidealet blir definert av Andrew Tate-typar med ideal om å verke sterke gjennom å snakke nedsetjande om kvinner. Vi må vere til stades i denne kulturkampen, seier han.

Vil ha diskusjon

Brenna legg vekt på ein diskusjon om kva desse verdiane skal vere.

– Eg synest vi burde sjå på kva ideal vi trekkjer fram, seier Brenna.

Ho meiner ytre høgre-rørsla vil bli mindre dersom fleirtalet har det betre.

– Trygge menneske kjenner seg ikkje trua av pride, seier ho.

Politikarane trekkjer fram at sosialdemokratiske parti har hatt framsteg i Norden dei siste åra og håpar på sosialdemokratisk siger under det svenske valet til hausten.

Fryktar stygg valkamp i Sverige

I Sverige hadde ytre høgre-partiet Sverigedemokraterna (SD) ei oppslutning på 20,4 prosent i juni og ligg på ein klar andreplass mot Socialdemokraterna (S).

Löfven har god tru på regjeringsskifte frå den noverande mindretalshøgreregjeringa beståande av partia Moderaterna (M), Liberalerna (L) og Kristdemokraterna (KD). Han trur også at valkampen vil bli brutal.

– Eg fryktar dessverre at det vil bli ein stygg valkamp, seier Löfven.

(©NPK)