(NTB-NPK): Sørlandschips har vedteke å stanse produksjonen etter at det braut ut brann i ventilasjonsanlegget på taket til produksjonsanlegget natt til fredag.

– Det blir stopp i produksjonen i dag for å tørke opp etter sløkkingsarbeidet, men vi startar opp igjen så fort som mogleg, dette blir neppe meir enn 24-timars stopp, seier samfunns- og styresmaktskontakt i Sørlandschips Sofie Oraug-Rygh til Avisa Kristiansand (KRS).

Ho beskriv hendinga som ein mindre pipebrann som raskt vart sløkt.

Rygh forsikrar også at dette ikkje går ut over tilgangen på chips framover.

Til Fædrelandsvennen sa Rygh tidlegare fredag at ingen vart skadde. To personar som kanskje hadde fått i seg røyk, vart undersøkte av helsepersonell på staden.

Politiet melde om brannen ved anlegget i Kristiansand kommune klokka 3.13.

Brannen var avgrensa til ventilasjonsrommet og ventilasjonsanlegget på taket, opplyste Kjell Esperås i 110-sentralen i Agder til NTB. Rett før klokka 4 natt til fredag var brannen meld sløkt.

Det var sju tilsette på jobb då brannen braut ut, og alle var ute av bygget då brannvesenet kom fram, melde avisa tidlegare.

Ifølgje brannvesenet ser dei materielle skadane ut til å vere avgrensa til ventilasjonsanlegget og taket. Utover dette er skadeomfanget uklart.

(©NPK)