(NPK–NTB): Politiet og kommunen riggar no Oslo sentrum for kong Haralds gravferd neste veke. Oslo kommune opplyser at framkomma kan bli vanskeleg.

Gravferda finn stad onsdag 9. september.

Det vil vere prosesjon frå Slottet til domkyrkja i forkant av seremonien, som startar klokka 13.00, og prosesjonar frå domkyrkja til Akershus festning etter seremonien.

Politiet opplyser at det krev eit høgt tryggingsnivå. Fleire område i Oslo sentrum blir derfor stengde for biltrafikk og kollektivtransport.

– Onsdag 9. september, frå klokka 06.00 til 21.00 blir området i sentrum sperra for trafikk. Alle som skal inn i det avsperra området (sjå kart) må gå til fots gjennom visitasjonspunkt bemanna av politi, opplyser Oslo kommune i ei pressemelding.

Kommunen ventar mange menneske i Oslo sentrum på gravferdsdagen, og det vil vere vanskeleg å komme seg fram på annan måte enn for gåande.

– Vi tilrår innbyggjarar og andre å reise kollektivt til Oslo, og spesielt til sentrum.

Her er følgjande endringar for kollektivtrafikken.

* Jernbanetorget stasjon og Majorstuen stasjon er dei to T-banestasjonane nærast sentrum som er opne på gravferdsdagen.

* Nasjonalteateret stasjon er open for avstiging og påstiging i retning aust. Hovudinngangen på Johanne Dybwads plass er stengd. Bruk sideinngangen frå Ruseløkka.

* Stortinget stasjon er stengd for av- og påstiging.

* T-banen køyrer elles som normalt.

* Trikken går ikkje i sentrum denne dagen.

* Bussen endrar rute for å unngå sperra område.

(©NPK)