(NPK-NTB-Bibiana Dahle Piene): Talet på kor mange som vil seie ja eller nei til EU, har ikkje endra seg nemneverdig, viser ei ny meiningsmåling frå Altinget. Nei-sida har framleis ei solid leiing.

Medan drygt éin av tre, 37 prosent, ville ha stemt ja om det var folkeavstemming no, ville 49 prosent stemt nei, viser den ferske meiningsmålinga som Opinion har gjort for Altinget og ABC Nyheter.

Dermed står den norske EU-motstanden nærast på staden kvil, trass i geopolitisk uro, krig og Donald Trumps tolltruslar.

I den førre målinga frå mars i år gjorde jasida eit byks fram med 5 prosentpoeng til nesten 38 prosent, ein signifikant oppgang frå august i fjor, men framgangen ser altså ut til å ha minka. 14 prosent svarer «veit ikkje».

Valforskar Johannes Bergh er overraska over at tala er så stabile.

– Eg synest eigentleg det er litt overraskande at haldningane ikkje har endra seg meir, gitt uroa ute i verda med krigen i Ukraina, tollkonfliktane med USA, og så vidare, seier han til ABC Nyheter.

Folk over 60 år er mest positive til EU. Her svarer 48 prosent ja, mot 42 prosent nei.

I andre enden av skalaen er det 60 prosent nei blant dei mellom 40 og 49 år. Også blant dei frå 18 til 40 år er eit fleirtal skeptiske til EU.

(©NPK)