(NPK-NTB-Peter Talos / Are Føli): Energiminister Terje Aasland beskriv kombinasjonen av vind- og vasskraft som eit kjærleiksforhold. Med LO og NHO på laget vil han raskare få ein betre balanse mellom kraftformene.

– Fordi når det blæs, og den turbinen står og går, så kan du spare på vatnet ditt til den tida der du verkeleg treng det. Det er som eit kjærleiksforhold mellom dei to produksjonsformene, seier energiministeren (Ap) entusiastisk til NTB.

Aasland er på Arendalsveka for å snakke om energi. Tre år etter at regjeringa lanserte kraftløftet i samarbeid med partane i arbeidslivet, heng dei langt etter.

Utbygging av ny kraft i Noreg tek tid, og no er tida i ferd med å renne ut medan behovet for kraft stig i rekordtempo.

Fredag la Aasland fram ein pakke for raskare utbygging av vindkraft og meir nett i Stortinget. Raudt og Frp karakteriserte planane som høvesvis eit mageplask og ein tabbe.

– Brenn litt på dass

I Arendal signerte LO, NHO og regjeringa under på ein ny avtale som forpliktar partane til å jobbe for raskare nett- og kraftutbygging.

Regjeringa vil saman med NHO og LO blåse nytt liv i samarbeidet frå 2023 for å nå målet om ferdige konsesjonar for 25 til 30 TWh ny fornybar kraft innan 2035.

– No brenn det litt på dass, innrømmer Aasland, som likevel avviser at han kjenner på desperasjon.

For både fagorganiserte og bedrifter er samde om at Noreg treng mykje meir kraft framover. Men fordi debatten om ein skal ha vindturbinar på land eller flytande til havs har vore så kjensleladd og vanskeleg å stå i, har mange opplevd det som vanskeleg å gå inn for nye utbyggingar.

– Bidra sterkare

LO-leiar Kine Visper Aspnes seier det er på tide å friske opp ambisjonane frå 2023.

Ikkje sidan 2019 er det gitt nye konsesjonar for vindkraft på land i Noreg. Samtidig lova regjeringa i 2023 eit stort kraftløft med meir straum og betre nettsamband innan 2030. No må det fortgang til for å nå konsesjonsmålet.

– Det vi eigentleg gjer no, er at vi skal bidra enno sterkare, særleg med å få debatten over på eit meir konstruktivt spor, seier LO-leiaren.

I samarbeid med regjeringa lovar LO og NHO å mobilisere internt i eigne rekker for å skape framdrift om kraftutbygginga. Dei skal gjere tydeleg konsekvensane potensiell kraftmangel kan få for arbeidsplassar og konkurransekrafta for norske bedrifter.

– No kan det skje noko, og då må ikkje Stortinget seie nei på grunn av nokon lettvinte populistiske løysingar. No må vi seie ja. No treng vi å få opp tempoet, elles så vil dette faktisk bli ei større krise enn vi har, sett for oss tidlegare, seier NHO-direktør Ole Erik Almlid.

Statsforvaltaren mistar rettar

Ifølgje Aasland vil lovforslaget leggjast fram for Stortinget for behandling innan neste vår.

Det blir opp til utbyggjarane å lage ei konsekvensutgreiing om prosjekta og søkje om konsesjon. Konsesjonar skal givast av NVE åleine, og Statsforvaltaren mistar sin innvendingsrett.

Med dette vil alle nye vindkraftprosjekt stå og falle med avgjerda hos kvar enkelt kommune.

Regjeringa vil foreslå i statsbudsjettet for neste år at staten forskoterer delar av produksjonsavgifta til kommunane, slik at dei får inntekter av kraftprosjekta allereie frå byggjestart.

(©NPK)