(NPK-NTB-Maria Möhring): Datatilsynet er i gang med kartlegginga av kva som skjedde då sparkesykkelselskapet Ryde vart utsett for eit massivt dataangrep denne helga. 1,6 millionar norske kundar fekk sensitive personopplysningar stolne i innbrotet.

Omtrent 4,5 millionar kundekontoar i Noreg, Sverige, Finland og Tyskland kan vere ramma. Ryde veit framleis ikkje kven som står bak, eller om personopplysningane er selde vidare.

Datatilsynet er no i gang med kartleggingsarbeidet.

– Vi har fått ei avviksmelding frå Ryde, og er i gang med å sjå på henne, seier seniorrådgivar Eirik Gulbrandsen i Datatilsynet til NTB.

– Først og fremst er vi opptekne av å følgje opp dei som er ramma. Deretter vil vi sjå på kva som har skjedd, forklarer han.

Tobias Balchen er administrerande direktør i Ryde. Han opplyser at selskapet ikkje er utestengt frå eigne system som følgje av dataangrepet. Dei har så langt ikkje teke imot pengekrav eller truslar frå dei som står bak.

– Vi har framleis ikkje teke imot noko krav, og alle systema våre er oppe og går som normalt. Vi er ikkje utestengde frå våre eigne system, det er ikkje den typen angrep, presiserer han til NTB torsdag morgon.

Personopplysningane som er på avvegar, omfattar mobilnummer, e-postadresser, fødselsdatoar og enkelte siffer i betalingskort. Forholdet er politimeldt.

Ryde har tidlegare opplyst at kundar ikkje treng å sperre bankkort som følgje av dette. Balchen oppmodar likevel kundane til å vere merksame på om uvedkommande tek kontakt.

– Ver aktsame om nokon ringer og gir seg ut for å vere frå Ryde eller banken. Spesielt om dei oppgir transaksjonsdetaljar, delar av kortnummer eller liknande betalingsdetaljar, seier han.

(©NPK)