(NPK-NTB): Storbritannia registrerte årets varmaste dag torsdag, etter at gradestokken nådde 38,1 grader i Vest-London, ifølgje det meteorologiske instituttet Met Office.

Årets førre varmerekord vart målt til 38 grader i slutten av juni. Den siste målinga på 38,1 grader slår framleis ikkje Storbritannias august-rekord på 38,5 grader som vart sette i 2003.

Met Office har på førehand sendt ut farevarsel om «ekstrem varme» for London og delar av Søraust-England, East Midlands, East of England, West Midlands og Sør-Yorkshire.

Torsdag ettermiddag vart farevarselet utvida til også å gjelde delar av Nordvest-England, skriv The Guardian.

Gjentekne hetebølgjer og tørke har bidrege til ein historisk varm sommar i Europa, og varmen har kosta tusenvis av menneske livet over kontinentet.

Europa er det kontinentet i verda som blir varma opp raskast, og mange stader er dårleg rusta til å handtere ekstrem varme.

Forskarar peikar på menneskeskapte klimaendringar som årsak til stadig varmare og hyppigare hetebølgjer.

(©NPK)