Microsoft-grunnleggjaren trur KI-æraen vil bli ein av dei mest turbulente periodane i menneskehistoria, og han etterlyser ein truverdig plan for å handtera utfordringane vi står overfor.
Den 70 år gamle Gates, som grunnla Microsoft i 1975, kjem med åtvaringa i eit langt essay på sin eigen blogg.
Kjelde til urettferd
– KI vil anten bli den største utjamnaren som nokosinne er oppfunnen, eller den verste kjelda til urettferd, skriv han.
– Det finst ingen plan for å letta overgangen til KI-æraen, meiner Gates, som heller ikkje trur at det kjem nokon slik plan.
– Dei geopolitiske og økonomiske insentiva pressar hardt på og vil ha full fart framover, skriv han.
Tre hovudrisikoar
Gates, som lenge var den rikaste mannen i verda, har overført store delar av formuen sin til ei velgjerdsstifting.
Han ser tre hovudrisikoar som følgje av den raske utbreiinga av KI:
Mange jobbar vil forsvinna permanent, og det vil bli stadig vanskelegare for unge å tre inn på ein arbeidsmarknad med langt færre moglegheiter.
KI kan også komma til å erstatta behovet for tenking, noko som i løpet av det kommande tiåret vil ramma alt frå juss og medisin til kundeservice, programvareutvikling og produksjon.
Somme oppgåver bør reserverast for menneske, meiner Gates, sjølv om KI kan gjera dei betre og billigare.
Vondsinna aktørar
Gates fryktar også at KI vil skapa nye og farlege moglegheiter for vondsinna aktørar.
Dataangrep skjer stadig hyppigare og blir stadig vanskelegare å gardera seg mot, og alt frå sjukehus og bankar til vass- og straumnett er utsette.
Det tredje risikoområdet gjeld barn og menneskelege relasjonar. Forskinga viser at KI-drivne chatbotar blir vanedannande ettersom dei aldri utfordrar eller frustrerer brukarane, noko som tek frå folk moglegheita til å byggja sosiale ferdigheiter, påpeikar Gates.
KI-robotar «tek frå oss lærdommen som vi får ved å knyta kontakt med andre menneske», skriv han.
(©NPK)
0 kommentarer