(NTB-NPK): Popheltane frå sekstitalet i The Hollies seier takk for seg som turnerande band – noko dei faktisk har halde på med heilt til no.

Det britiske popbandet har halde det gåande på konsertfronten sidan 1963, året etter at det vart stifta av Allan Clarke og Graham Nash. Det vart aldri løyst opp, sjølv om Nash gjekk vidare til å stifta Crosby, Stills and Nash.

Gitarist Tony Hicks (80) og trommeslagar Bobby Elliott (84) kom begge med i 1963 og har halde koken sidan saman med eit knippe yngre bandmedlemmer – heilt til dei no takkar for seg.

«Av helsegrunnar har Tony bestemt seg for å slutta å turnera. Av respekt for Tony og alt dei har delt gjennom den oppsiktsvekkjande reisa si saman, har Bobby også bestemt seg for å slutta å turnera», skreiv bandet i sosiale medium torsdag kveld.

– Me har turnert kvart einaste år. Kvart år i over 50 år. Me gjer ikkje dette for pengane, me gjer det for den ståande applausen. Me har ein trufast fanskare. Ungane deira kjem òg, og barna deira igjen, sa Bobby Elliott til NTB i 2014 – i forkant av at The Hollies gjorde fire utselde konsertar i Oslo, Trondheim og Bergen.

Siste turné til Noreg var i 2023, då bandet feira 60-årsjubileet.

Så trufaste mot publikummet var Elliott og Hicks at dei ikkje møtte opp då The Hollies vart innlemma i Rock and Roll Hall of Fame i USA i 2010 – men prioriterte ein allereie avtala konsert.

Variety skriv at dei som vil høyra Hollies-låtar live, framleis har moglegheit: Graham Nash gjer mellom anna «Bus Stop» på turneen han no er ute på, medan vokalisten som erstatta han, Terry Sylvester, framleis opptrer med eit «of the Hollies»-opplegg.

(©NPK)