(NPK-NTB): Kariesførekomsten blant barn og unge i Noreg blir stadig mindre. Fleire undersøkte attenåringar i 2025 har aldri hatt hol.

Den offentlege tannhelsetenesta tilbyr gratis tannhelsetenester til barn og unge 0–18 år, og frå treårsalder er det vanleg å bli kalla inn til regelmessig kontroll.

I 2025 vart i overkant av 650.000 barn og unge 3–18 år, eller om lag 65 prosent av denne gruppa, undersøkte og/eller behandla, viser nye tal frå Statistisk sentralbyrå.

Tannhelsa til barn og unge har vorte stadig betre dei siste 40 åra. Årsakene som ofte blir trekte fram som dei viktigaste, er innføring av fluor i tannkremen, og betre generell munnhygiene, med tannpuss morgon og kveld.

– Frå 1985 til 2025 har det vorte ein stadig større del barn og unge utan hol i tennene. Utviklinga har vore spesielt positiv blant attenåringane, seier Trond Ekornrud, seniorrådgivar ved seksjon for helse-, omsorgs- og sosialstatistikk i SSB.

Sjølv om tannhelsa til barn og unge har vorte betre for landet samla, er det forskjellar mellom fylka. Innlandet og Oslo er fylka med størst del undersøkte/behandla attenåringar utan hol, medan Finnmark og Møre og Romsdal har minst.

(©NPK)