(NPK-NTB-Kathrine Vikne Holth): Sjølv om det fleire stader i landet har vore ein kald og våt norsk sommar, har det vore mykje verre før. No kjem derimot varmen litt tilbake, men hausten kan bli våtare enn vanleg.

– I år har det vore ein spesielt dårleg sommar, seier vakthavande ved Meteorologisk institutt, Julie Solsvik Vågane, til NTB.

Ho legg til at trass i ein sommar med mykje nedbør i delar av landet, har det vore verre før.

– Det har vore mykje kaldare før. I 1962 var det berre 24 sommardagar i Oslo, medan vi i år har hatt 67 sommardagar.

Lenger nord i landet kunne talet på sommardagar i 1962 teljast på éi hand. I Tromsø var det tre sommardagar, samanlikna med i år, då det har vore åtte sommardagar.

I Oslo var også høgaste temperatur i 1962 målt den 7. juni, då var temperaturen på 26 varmegrader.

– Sommaren i 1962 var ikkje veldig bra, han var betrakteleg verre enn sommaren i år.

Når det gjeld vêret dei neste vekene og månadene, er det både positive og negative nyheiter.

Ifølgje Vågane vil det vere temperaturar på over 20 grader fleire stader i landet den neste veka, og nokre stader vil få opp mot 25 grader.

Hausten lèt enno vente på seg, men dei neste månadene kan bli våtare fleire stader i landet ifølgje prognosane til meteorologane.

– Vi kan vente oss 50 prosent meir nedbør enn normalt i månadene september, oktober og november, seier vakthavande til NTB.

Dei store nedbørsmengdene er først og fremst venta på Austlandet og i Agder, medan lenger nord i landet vil bli tørrare enn normalt.

(©NPK)