(NPK-NTB-Per Helge Berg): Nesten 2000 tilsette ved lufthamnene kan gå ut i streik viss meklinga som startar i dag, ikkje fører fram.

Førre veke vart ein streik blant kabintilsette i SAS hindra ved at partane vart samde, men ein streik blant dei bakketilsette kan føre til at både SAS, Norwegian og Widerøe blir ramma.

Meklinga mellom Parat (YS), Handel og Kontor (LO) og NHO Luftfart startar tysdag morgon og går ut ved midnatt natt til 13. august.

Blir ikkje partane samde, blir det streik frå starten av arbeidstida torsdag 13. august.

Vil merkast

– Medlemmene våre står i frontlinja og møter passasjerane gjennom heile reisa, frå innsjekk og boarding til forseinkingar, kanselleringar og andre uventa hendingar. Så det er klart at ein eventuell streik vil merkast på dei flyplassane som blir tekne ut, seier forhandlingsleiar Christopher Beckham i Handel og Kontor i ei pressemelding.

I forhandlingane mellom Handel og Kontor Norge og NHO Luftfart handlar usemja om oppgjeret samla sett. Heilt sentralt er lønn, tillegg for ukomfortabel arbeidstid, verdsetjing av kompetanse og behov for å jamne ut lønnsforskjellar.

– Det var altfor stor avstand då vi møttest til forhandlingar, og det er fleire krav som må forhandlast og landast. Vi går inn i meklinga med mål om å sikre eit godt resultat for medlemmene våre, seier Beckham.

– Kan bli vanskeleg

– Viss alle blir tekne ut i streik, så blir det vanskeleg å drive flyselskap, men selskapa må sjølv uttale seg konkret om konsekvensane, har kommunikasjonsleiar Trygve Bergsland i Parat tidlegare uttalt overfor NTB i ein e-post.

Då det vart brot i dei direkte forhandlingane, opplyste Parat at dei hadde mål om auka kjøpekraft og føreseielegheit i arbeidskvardagen for medlemmene, men at dei ikkje vart samde om ein totalitet som dekte krava.

Handel og Kontor Norge har i sitt første streikeuttak varsla plassfråtreding for 186 medlemmer ved seks flyplassar, medan Parat har varsla plassfråtreding for 101 medlemmer i første omgang.

Håpar på semje

Blir streiken utvida, kan totalt nesten 2000 tilsette bli tekne ut i streik.

Ein streik kan ramme bakketenester på flyplassane, som innsjekk, boarding, bagasjehandtering, kundeservice og tilsette i administrasjon.

– Det kjem til å bli ei krevjande mekling, men vårt klare mål og håp er at vi skal lykkast med å bli samde. skriv administrerande direktør Erik Lahnstein i NHO Luftfart i ein e-post til NTB.

(©NPK)